排球訪問稿寫完了

排球篇文，寫左成3600字，後來自己劈左800字
後來老編又幫我劈左400，終於都完左一件心事。

雖然已經面目全非，都希望d人覺得好睇啦
寫稿佬既心願係簡單既o者

採訪手記

今日同馬夫去左FSD採花，上晝我單拖，先探一下路，下晝就拖埋佢去，補左好多相，估唔到咁樣都攪左成日去……



OH，琴晚交完毓民，今日又堆左一大堆蘭花係個腦度，但明天要交的是排球文﹗隔左三日再寫，真係有D難度……



人生就係咁，永遠唔俾你專心做一樣野……

戰地採訪﹗﹗

今日400就去左理大，睇決賽：IVE 對中大。

果然好有大戰氣氛，馬夫也到場，於是就開始佢既喪影行動，成班女仔俾佢係咁影，大慰佢平生啦呢次。後來又設計左一D圖片，同班友玩「狐狸先生幾多點」。呢D相真係N年之後可能有用，一時三刻就係玩樂多於交差。

今場有啦啦隊出現啦，應該係有高人發功既。比賽過程係《NO.27》都寫左啦，總之都係一如所料地攪掂對手，不過後上反勝就證明佢地有料到，淡定實有剩既。



賽後乘興，我同馬夫都有餐食，同教練狂劈清酒，開開心心又過左一晚。不過我既煩惱又開始啦，寫稿真係幾傷神……重有好多善後工作等緊我……


其實我的工作最重要部份，現在才真正開始……


寫稿佬就係咁……

採訪手記

今日夜晚又約左班IVE女排，佢地係柴灣IVE有最後練習。

賽前有個生日會，隊長生日喎，成班傻大姐玩到癲，我就猛食猛飲，之前冇乜食過野呀大佬……

不過我咁專業，呢D戰事場面我都有拍低，留念都好丫

之後就同成班女仔吹左一陣水，拜上次問左個D問題所賜，打開到話匣了。後來又同教練嗲左好耐，呢次就談得更深入了，但係覺得吸了太多料，恐怕今次都係寫唔哂……



歸家都已經十時半了，睇《大長今》先…@_@

採訪手記

今日本來想去採訪隊女排在青衣IVE集訓既情況不過又覺得大戰前夕，佢地可能有D密斟，不如唔好阻住地球轉啦~於是我就叫FELIX幫我問佢地七條問題留為後用呢個方法，我都係自行想出來，十二個女仔，好難逐個問題。要各個擊破，真係要D辦法……又學到野啦﹗

採訪手記

青年學院開放日，我又重回舊地，見到ANNA同MABEL，仲有阿德同VIVIAN。

阿德個樣唔同左，VIVIAN就好期待我篇報導。我唸，死火，睇完篇野，下之俾佢見到實打我一鑊甘。XDDDD

今日無他，純粹因為毓民來講TALK，就知道此君出口成文，一定有野講，決定跟埋黎，果然寫到一篇野，咁又一版啦，真係爽﹗我又在青年學院HEA左大半日，430回到灣仔總部，又攪左成粒鐘，之後就去春茗啦。

春茗呢一劑，又係無聊到爆，影相，嘩，今日做左成十個鐘，好在28號請左假，今日就豪俾佢……

採訪手記

今期都未完，就要為下一期奔波啦。

老編話下一期要做健康生活，都幾難到我……
好在有人報料，原來財務科有好多人種野，去行左一圈，睇過下環境，有得做喎，老編SAY左YES。哈，正，咁又一篇專題啦

不過仲大把野要唸……

採訪手記

又到了埋稿日，幾歷艱辛終於都寫完。
VM話：「好，冇下次﹗下次唔會咁趕﹗」

哈哈，真係言猶在耳，三月咪又係一樣﹗(果然係一樣﹗)

D字同圖塞到滿，睇完都覺得核突……
算

採訪手記

今日去左理大睇個隊女排，四強戰對浸大，可惜我冇相機。

望都望佢地入決賽啦，唔係我篇專題就凍過水。我一早就到左場，睇左第一場，人地D啦啦隊真係好多人。浸大都唔少人，IVE就真係冇自己啦啦隊。教練大人不戲言﹗

呢個世界，特別在體育場上，心理質素好既一隊，往往會有超水準發揮，甚至可以改變技術上既差距。小弟踢左兩年聯賽當然深明此道，觀今日之排球比賽亦是如此。IVE隊實有係有，不過心散，BU班女仔成隊德國波咁，真係好勁，打極都唔死；不過IVE既技術同身高都勝何止一皮？正如墨西哥踢得再好都難贏到巴西一樣，IVE仍然以3-0結果了BU。

不過IVE班友賽後就俾教練訓話啦，在我看來教練真係好忍手地片。咁樣既發揮打到決賽就真係危左D，入得決賽既通常都唔係善男信女。同埋佢地似乎欠缺左D應有既古惑野，或者係我睇唔出，又或者雖然大專盃係高水平既大賽，但仍然未去到好慘烈個一種，例如小弟踢緊既石地王，簡直係打仗一樣，每一著都機關算盡。

睇呢D比賽既野我感受就特別深，可能自己攪波方面經歷得多左，我相信自己會有好貨交出黎，希望我真係講得出做得到，實踐我「做專題一定要放長時間」既理念，提升《NO.27》既深度同質素。寫落PROFLIO都正D丫﹗

採訪手記

今日無啦啦去左青衣ive，幫gallery影兩張相。 呢排創意玩具設計及科技係既學生，用雜誌撕下既紙碎貼成一張又一張既印象派名畫，都算係用心既創作。 又好野wor，班友在就黎拆既lab畫壁畫，又有d十分有心思。小弟就冇呢d機會，其實畫大野既經驗好難得，需要好好基本功，道理就好似要你寫大字一樣，d野大一放就知你有冇料到。黃永玉個d大幅畫就真係好勁，咁大幅仍然表達強烈個人風格，我拍馬都未有佢既水準。 同coleman和蕭博士談開他們的系的將來，果然係有d野心，不過講到尾，就算佢地有諗頭，都要有明主先得。學佢地話齋，d廠家原來只需要佢地訓練d技術員出來，俾佢地搾壓，完全唔需要又識設計又識自己動手做既人，咁就真係讀左都side撚氣。 遲d做關於業界關係，呢個會係一個幾有深度既話題：廠方的眼光和考慮。一個非常成功既例子就足夠了，千奇唔好歌德派，我需要既有眼光有現實既廠家，咁先夠impact。

　

採訪手記

今日去維園年宵補相，咁多人都入到去，算唔錯啦。

兩檔人馬果然展開最後衝刺，大家佈陣都好森嚴，人馬亦比之前充足。自己做老細，點都加多兩錢肉緊既，不過我部死人機就唔係好生性，唔係有鬼影就係黃左，呢部野leica真係唔係好得，雖然貴，但我用部5000都好似好過佢﹗唉﹗

今日年三十晚放早，三點走人，我就係維園攪到六點幾先走，返到葵芳把心一橫，終於買左對鞋。回到家裡團年飯已在吃，俾老豆片……



開始心想：為左工作，自己連和家人相處既時間也犧牲了，覺得唔係好值得。之前我咁訓身，因為家裡收入很低，我做左半年經濟支柱，壓力大到非常，工作到忘我，踢波、畫野、愛情、學業幾乎統統都放棄哂。



但而家好景左少少，開始咁樣做人真係唔會長命……

我曾經花咁多時間建立咁多樣能力，其實可以擁有更多野，環境所迫一時放棄，係唔係時候pick up番一d？



如果工作俾唔到我生活空間，咁，這是否請辭的時候？

採訪手記

今日去左採訪個一隊ive女排，在柴灣ive體育館練習，1800。
咁多女既場合，點會唔叫埋馬夫去呢？

見到felix同教練謝峰，十二位女排只來了九位，其他三名(後來才知道是主力)病左，下，呢d傷病問題都幾嚴重喎~~~

我就同教練嗲，馬夫就猛咁影。畢業都係初次見面，未進入狀態，今日睇怕都係冇乜野問得到，臨完場介紹一下自己就算收貨啦，來日方長呢。

不過呢班姐仔打波都有d功駕既，有幾個樣子也不錯呢。呢個專題真係有得大做呀﹗馬夫哥話730約左gf，條友影到800都唔收手，就知乜野事啦﹗於是我就滿足下佢，叫齊九個一齊埋來，近近地互通姓名影下相咁。

哈，咁又一日。

採訪手記

收到一張ive女排既相。

咦，呢個topic好似有得寫下喎，起碼呢單野都已經發生左一段時間。由十一月開始既初賽、聖誕特訓到而家最後兩場初賽，前後都有三個月，到三月完左決賽，成半年，有內容既topic，幾時都唔怕冇野寫。

跟呢個先。

採訪手記

寫稿寫到病，唯有賦閒在家。

結果想不到，在家就完成了兩篇稿。老實講，寫野既人想要有好貨交，一定要在輕鬆的環境。創作這事情，有時十分難以衡功量值。唯有檢討自己手法精益求精，好難有數得計。

但偏偏會有人妄想用數學來描述整個世界。真係低九能。

採訪手記

今日沙田IVE攪左一壇傑出教學獎論壇

其實三位得獎者我都見慣見熟了，佢地想說的內容也是大同小異了，倒是來拍幾張照而已

哈哈，又有一餐食，真係開心﹗同Dazzle Orchestra也熟了，看看將來會否做到一個專題啦。不過新老細就上任，一切都不在我的控制範圍內。